Pepuwa Chawle | ᱯᱮ ᱯᱩᱣᱟ. ᱪᱟᱣᱞᱮ

 

ᱵᱷᱟ.ᱜᱤ ᱛᱮ ᱯᱟ.ᱨᱣᱟ. ᱦᱟᱲᱚᱠ ᱡᱚᱝ ᱢᱮ !

-ᱚᱲᱟᱜ ᱵᱚᱞᱚ ᱛᱟᱨᱟ ᱜᱮ ᱢᱚᱱᱚᱡᱽ ᱟᱡ ᱜᱳ (ᱟᱭᱳ) ᱫᱚ ᱮᱫᱨᱮ ᱥᱟᱞᱟᱜ ᱮ ᱨᱚᱲ ᱫᱟᱨᱟᱢ ᱠᱤᱫᱤᱧᱟ ᱾

"ᱚᱠᱚᱭᱮ ᱞᱟ.ᱴᱤᱡ ᱟᱫᱢᱮᱭᱟ, ᱵᱷᱟ.ᱜᱤ ᱛᱮ ᱯᱟ.ᱨᱣᱟ.ᱢ ᱧᱩᱭᱮᱫ ᱠᱟᱱᱟ ? ᱤᱧ ᱞᱮᱠᱟᱱ ᱥᱟᱦᱮᱵ ᱦᱚᱲ ᱜᱮ ᱯᱟ.ᱨᱣᱟ. ᱫᱚᱠᱚ ᱧᱩᱭᱟ" ᱾

ᱩᱱᱤᱭᱟᱜ ᱮᱫᱽᱨᱮ ᱨᱚᱲᱮᱫ ᱞᱟ.ᱜᱤᱫ ᱤᱧ ᱨᱚᱲ ᱠᱮᱫᱟ᱾

"ᱥᱟᱦᱮᱵᱽ ᱱᱟ ᱛᱟᱦᱮᱵᱽ ᱚᱲᱟᱜ-ᱫᱩᱣᱟ.ᱨ ᱨᱮᱭᱟᱜ ᱪᱤᱱᱟᱛᱟ. ᱵᱟᱝ, ᱮᱨᱟ ᱦᱚᱯᱚᱱᱟᱜ ᱯᱷᱤᱠᱤᱨ ᱵᱟᱝ, ᱜᱤᱫᱽᱨᱟ. ᱞᱟ.ᱜᱤᱫᱱ ᱢᱤᱫᱴᱤᱡ ᱟᱸᱜᱽᱨᱚᱵ ᱦᱚᱸ ᱵᱟᱢ ᱦᱩᱜᱟ.ᱲ ᱫᱟᱲᱮᱭᱟᱜ ᱠᱟᱱᱟ ᱟᱨ ᱱᱚᱛᱮ ᱥᱟᱦᱮᱵᱮᱢ ᱥᱟᱡᱟᱣᱚᱜ ᱠᱟᱱᱟ ! ᱟᱡ ᱠᱟᱛᱷᱟᱭ, ᱥᱚᱢᱟᱡᱽ ᱮ ᱥᱩᱫᱷᱨᱟ.ᱣᱟ ! ᱯᱟ.ᱦᱤᱞ ᱫᱚ ᱟᱢᱟᱜ ᱦᱟᱞᱚᱛ ᱥᱩᱫᱷᱨᱟ.ᱣ ᱞᱮᱛᱟᱢ, ᱛᱚᱵᱮᱭᱟᱱᱤᱡ ᱥᱚᱢᱟᱡᱽ ᱫᱚᱢ ᱧᱮᱞᱟ ᱾ ᱟᱡ ᱠᱟᱛᱷᱟᱭ ᱜᱷᱩᱥ ᱰᱟ.ᱧ ᱦᱟᱛᱟᱣᱟ ᱾ ᱞᱟ.ᱴᱩ-ᱞᱟ.ᱴᱩ ᱩᱸᱴ ᱠᱚ ᱩᱱᱩᱢ ᱮᱱᱟ, ᱜᱟᱫᱷᱟᱭ ᱠᱩᱜᱞᱤ ᱠᱟᱱᱟ, ᱛᱤᱱᱟ.ᱜ ᱫᱟᱜ ᱢᱮᱱᱟᱜ-ᱟ ? ᱮᱫᱽᱨᱮ ᱡᱟ.ᱥᱛᱤ ᱭᱮᱱ ᱞᱮᱠᱟ.ᱧ ᱵᱩᱡᱷᱟ.ᱣ ᱠᱮᱫᱟ ᱾

"ᱛᱚᱵᱮ ᱤᱧ ᱫᱚ ᱜᱟᱫᱷᱟ ᱜᱮᱢ ᱵᱩᱡᱷᱟ.ᱣ ᱠᱤᱫᱤᱧᱟ.? "ᱜᱟᱫᱷᱟ ᱵᱟᱝᱠᱷᱟᱱ ᱫᱚ ᱪᱤᱞᱤ ?

ᱱᱚᱣᱟ ᱠᱟᱛᱷᱟ ᱟᱡᱚᱢ ᱠᱟᱛᱮ ᱛᱟᱜᱯᱟ ᱜᱮ ᱥᱟᱱᱟ ᱠᱤᱫᱤᱧᱟ, ᱢᱮᱱᱠᱷᱟᱱ ᱚᱞᱚᱜ-ᱯᱟᱲᱦᱟᱣ ᱦᱚᱲ ᱦᱩᱭ ᱠᱟᱛᱮ ᱦᱚᱸ ᱟᱯᱱᱟᱨ ᱚᱭᱳ ᱦᱚᱲᱮᱢ ᱛᱷᱟᱯᱟᱭᱮ ᱫᱚ ᱟ.ᱰᱤ ᱞᱟᱡᱟᱣ ᱨᱮᱱᱟᱝ ᱠᱟᱛᱷᱟ ᱜᱮ ᱾ ᱛᱷᱤᱨ ᱡᱚᱝ ᱤᱱᱟ.ᱧ ᱯᱟᱨᱠᱚᱢ ᱨᱮ ᱫᱩᱲᱩᱵ ᱛᱷᱤᱨ, ᱥᱟᱦᱮᱵᱽ ᱠᱟᱱ ᱨᱮ ᱦᱩᱧ ᱤᱧᱟᱜ ᱢᱟ ᱠᱩᱨᱥᱤ ᱵᱟ.ᱱᱩᱜ ᱛᱤᱧᱟ ᱾ ᱚᱠᱚᱭᱮᱢ ᱠᱚᱭᱮᱭᱟ ?

ᱢᱤᱫ ᱜᱷᱟ.ᱲᱤᱠ ᱛᱟᱭᱱᱚᱢ ᱠᱷᱟᱱ ᱜᱮ ᱟᱨ ᱦᱚᱸ ᱨᱚᱲ ᱟᱡᱚᱢ ᱮᱱᱟ-"ᱤᱧ ᱨᱮᱱ ᱯᱮᱲᱟ ᱠᱚ ᱦᱤᱡᱩᱜ ᱠᱷᱟᱱ ᱫᱚ ᱯᱩᱭᱥᱟ. ᱵᱟ.ᱱᱩᱜᱼᱟ ᱢᱮᱱ ᱫᱚ ᱚᱠᱟ ᱠᱷᱚᱱᱤᱧ ᱟ.ᱜᱩᱭᱟ ? ᱟᱨ ᱪᱤᱛᱛᱚᱨᱚᱧᱡᱚᱱ ᱨᱮ ᱥᱮᱱᱤᱢᱟ ᱠᱷᱟᱱ ᱫᱚ ᱯᱚᱠᱮᱴ ᱠᱷᱚᱱ ᱱᱚᱴ ᱜᱮ ᱯᱷᱟ.ᱱᱴᱤᱞ‌ ᱛᱩᱫᱩᱜ ᱛᱟᱭᱟ " ᱾ ᱯᱟᱺᱰᱤᱜ ᱠᱟᱱ, ᱪᱟᱰᱨᱟᱜ ᱠᱟᱱ ᱨᱮᱦᱚᱸ ᱵᱩᱫᱷᱤ ᱢᱟ ᱵᱟᱝ ᱦᱮᱡ ᱟᱢ ᱠᱟᱱᱟ ᱾ ᱱᱚᱝᱠᱟᱭ ᱵᱟᱰᱟᱭ ᱦᱟᱞᱮᱸᱸᱸᱸᱸ ᱠᱟᱛᱷᱟ ᱫᱚ ᱵᱟᱭ ᱨᱚᱲ ᱯᱩᱨᱟ.ᱣ ᱞᱮᱫᱟ ᱾

ᱤᱧ ᱦᱚᱸ ᱮᱫᱽᱨᱮ ᱫᱚ ᱵᱟ.ᱧ ᱥᱟᱢᱲᱟᱣ ᱞᱮᱫᱼᱟ " ᱱᱚᱝᱠᱟᱢ ᱵᱟᱰᱟᱭ ᱦᱟᱞᱮ ᱪᱮᱫ ᱮᱢ ᱪᱮᱠᱟ ᱠᱮᱭᱟ ? ᱰᱷᱮᱨ ᱫᱚ ᱟᱞᱚᱢ ᱨᱚᱲᱟ ᱸᱸᱸᱸᱸ -ᱮᱫᱽᱨᱮ ᱫᱩᱧ ᱥᱟᱢᱲᱟᱣ ᱠᱮᱫᱼᱟ ᱾ "ᱦᱮᱸ ᱮᱱᱛᱮ, ᱱᱤᱛᱚᱜ ᱫᱚ ᱪᱮᱫᱟᱜ ᱵᱟᱢ ᱨᱚᱲᱟ, ᱜᱤᱫᱽᱨᱟ. ᱮᱸᱜᱟᱛ ᱤᱱᱟ.ᱧ ᱛᱚ ?

"ᱢᱮᱛᱟᱢ ᱠᱟ.ᱱᱟ.ᱧ, ᱛᱷᱤᱨᱩᱜ ᱢᱮ ᱟᱨ ᱵᱟᱝ ᱠᱷᱟᱱ ᱵᱩᱡᱷᱟ.ᱣᱟᱢ ! ᱱᱚᱣᱟ ᱠᱟᱛᱷᱟ ᱨᱚᱲ ᱯᱩᱨᱟ.ᱣ ᱥᱟᱶ ᱛᱮᱜᱮ ᱯᱮᱭᱟ ᱱᱟᱣᱟ ᱠᱚᱲᱟ.ᱧ ᱧᱮᱞ ᱠᱮᱫ ᱠᱚᱣᱟ ᱾ ᱤᱧ ᱧᱮᱞ ᱠᱟᱛᱮ ᱼᱼᱼ " ᱢᱟ ᱡᱚᱦᱟᱨ ᱜᱮ ᱢᱟᱦᱟᱥᱚᱭ !

" ᱡᱚᱦᱟᱨ ! ᱵᱤᱞᱟᱠᱟᱱ ᱯᱟᱨᱠᱚᱢ ᱨᱮ ᱫᱩᱲᱩᱵ ᱤᱧ ᱢᱮᱛᱟᱫ ᱠᱚᱣᱟ ᱾ ᱫᱩᱲᱩᱵ ᱵᱟᱲᱟ ᱮᱱᱟᱠᱚ ᱾ " ᱛᱚᱵᱮ, ᱚᱠᱟ ᱥᱮᱱ ? " ᱼᱼᱼ ᱠᱩᱞᱤ ᱠᱮᱫ ᱠᱚᱣᱟ.ᱧ " ᱟᱢ ᱴᱷᱮᱱ ᱜᱮᱞᱮ ᱦᱮᱡ ᱟᱠᱟᱱᱟ-ᱪᱤᱛᱛᱚᱨᱚᱱᱡᱚᱱ ᱠᱟ.ᱨᱠᱷᱟᱱᱟ ᱨᱮ ᱠᱷᱟᱞᱟᱥᱤ ᱨᱮ ᱠᱟ.ᱢᱤ ᱦᱩᱭᱟᱠᱟᱱ ᱛᱟᱞᱮᱭᱟ ᱾ ᱚᱱᱟᱛᱮ Cast Certificate ( ᱡᱟ.ᱛᱤ ) ᱟᱨ Character Certificate ( ᱪᱩᱨᱤᱛ ) ᱵᱟᱠᱷᱨᱟ ᱞᱮ ᱦᱮᱡ ᱟᱠᱟᱱᱟ ᱾ ᱟᱫᱚ, ᱤᱧ ᱫᱩᱧ ᱪᱮᱠᱟ ᱦᱟᱯᱮᱭᱟ ? ᱤᱧᱟᱜ Character ᱢᱟ ᱵᱟᱝ.ᱲᱤᱡ ᱜᱮ ᱾ ᱛᱚᱵᱮ Cast Certificate ᱞᱟ.ᱜᱤᱫ ᱫᱩᱧ ᱠᱩᱨᱩ ᱢᱩᱴᱩᱭᱟ " ᱵᱟᱝ ᱢᱟᱦᱟᱥᱚᱭ ᱠᱩᱨᱩᱢᱩᱴᱩ ᱫᱚ ᱠᱟ.ᱢᱤ ᱯᱩᱨᱟ.ᱣ ᱠᱟᱜ ᱛᱟᱞᱮᱢ ᱡᱟᱸᱦᱟ ᱜᱮ ᱞᱟᱜᱟᱜᱼᱟ ᱚᱱᱟ ᱫᱚᱞᱮ ᱮᱢᱟᱢᱟ ᱾ ᱟᱞᱮ ᱛᱮᱫᱚ ᱪᱮᱫ ᱦᱚᱸ ᱵᱟᱞᱮ ᱪᱮᱠᱟ ᱫᱟᱲᱮᱭᱟᱜᱼᱟ ᱾ ᱵᱤᱪᱠᱚᱢ ᱟᱢ ᱦᱚᱸ ᱛᱟ.ᱲᱤ ᱧᱩ ᱞᱮᱠᱟ ᱫᱚᱞᱮ ᱮᱢᱟᱢᱟ ᱾

"ᱴᱟᱠᱟ ᱫᱩᱧ ᱪᱮᱠᱟᱭᱟ ? ᱤᱧ ᱦᱚᱛᱮ ᱛᱮ ᱠᱟ.ᱢᱤ ᱫᱚ ᱚᱦᱚ ᱦᱩᱭ ᱠᱚᱜᱼᱟ ᱫᱩ ᱪᱟᱞᱟᱜ ᱯᱮ ᱾ ᱵᱮᱨᱮᱫ ᱚᱰᱚᱠ ᱮᱱᱟ ᱠᱚ ᱾ ᱠᱩᱞᱦᱤ ᱥᱮᱫ ᱠᱷᱚᱱ ᱪᱮᱠ ᱠᱚ ᱦᱩᱫᱤᱥ ᱠᱟᱛᱮ ᱪᱚᱠᱚ ᱨᱩᱣᱟ.ᱲ ᱦᱮᱡ ᱮᱱᱟ ᱾

ᱛᱚᱵᱮ, ᱢᱟᱦᱟᱥᱚᱭ ᱟᱢ ᱪᱷᱟᱰᱟ ᱫᱚ ᱚᱠᱚᱭᱞᱮ ᱥᱟᱵ ᱠᱚᱣᱟ ᱟᱢ ᱫᱚ ᱟᱵᱚ ᱡᱟ.ᱛ ᱠᱟᱱᱟᱢ ᱾ ᱢᱟ ᱠᱟ.ᱢᱤ ᱠᱟᱜ ᱛᱟᱞᱮᱢᱮ ᱮᱢᱟᱢᱟᱞᱮ ᱾ ᱴᱷᱤᱠ ᱜᱮᱭᱟ ᱜᱟᱯᱟ ᱠᱟ.ᱪᱦᱟ.ᱨᱤ ᱛᱮ ᱦᱤᱡᱩᱜ ᱯᱮ ᱾ ᱱᱚᱝᱠᱟ.ᱧ ᱢᱮᱛᱟᱫ ᱠᱚ ᱠᱷᱟᱱ ᱩᱱᱠᱩ ᱫᱚᱠᱟ ᱪᱟᱞᱟᱣᱮᱱᱟ ᱾

ᱮᱱ ᱦᱤᱞᱚᱜ ᱫᱟᱠᱟ ᱡᱚᱢ ᱵᱟᱲᱟ ᱠᱟᱛᱮ ᱞᱮ ᱜᱤᱛᱤᱡ ᱟᱠᱟᱱᱟ ᱾ ᱜᱤᱫᱽᱨᱟ. ᱫᱚᱭ ᱡᱟ.ᱯᱤᱫ ᱠᱮᱫᱼᱟ ᱾ ᱤᱧ ᱫᱚ ᱵᱟ.ᱧ ᱡᱟ.ᱯᱤᱫ ᱫᱟᱲᱮᱭᱟᱜ ᱠᱟᱱᱟ ᱾ ᱦᱩᱫᱤᱥᱮᱫ ᱠᱟ.ᱱᱟ.ᱧ ᱯᱮ ᱥᱟᱭ ᱴᱟᱠᱟ ᱛᱮ ᱢᱤᱫ ᱪᱟᱸᱫᱚ ᱦᱚᱸ ᱵᱮᱥ ᱛᱮ ᱵᱟᱞᱮ ᱡᱚᱢ ᱯᱩᱨᱟ.ᱜ ᱠᱟᱱᱟ ᱾ ᱱᱤᱛ ᱢᱟ ᱢᱤᱫᱴᱟᱝ ᱜᱮ ᱜᱤᱫᱽᱨᱟ. ᱢᱮᱱᱟᱭᱟ ᱟᱨᱠᱚ ᱥᱟᱸᱜᱮ ᱞᱮᱱ ᱠᱷᱟᱱ ᱾ ᱴᱷᱤᱠ ᱜᱮ ᱥᱟᱨᱠᱟᱨ ᱯᱚᱨᱤᱣᱟᱨ ᱱᱤᱭᱚᱡᱚᱱ ᱟᱨ ᱞᱟᱵᱽ ᱵᱚᱪᱚᱛ ᱯᱚᱱᱛᱷᱟ ᱨᱮᱭᱟᱜ ᱠᱟᱛᱷᱟ ᱫᱚᱭ ᱞᱟ.ᱭ ᱯᱟᱥᱱᱟᱣᱮᱫᱼᱟ ᱾ ᱱᱚᱣᱟ ᱫᱷᱟ.ᱨᱛᱤ ᱨᱮ ᱵᱮᱥ ᱛᱮ ᱛᱟᱦᱮᱸᱱ ᱫᱚ ᱢᱤᱥᱠᱤᱞ ᱜᱮᱭᱟ ᱾ ᱟᱪᱷᱟ ᱟᱨ ᱚᱠᱚᱭ ᱴᱷᱮᱱ ᱜᱮᱞ ᱢᱚᱬᱮ ᱴᱟᱠᱟ ᱢᱮᱱᱟᱠᱚ ᱧᱟᱢᱚᱜ ᱠᱟᱱᱟ, ᱩᱱᱠᱩ ᱫᱚ ᱪᱮᱠᱟᱠᱚ ᱟ.ᱥᱩᱞᱚᱜ ᱠᱟᱱᱟ ? ᱦᱩᱫᱤᱥ-ᱦᱩᱫᱤᱥ ᱛᱤᱧ ᱡᱟ.ᱯᱤᱫ ᱠᱮᱫᱼᱟ ᱾ ᱛᱟᱞᱟ ᱧᱤᱫᱟ. ᱜᱟᱱ ᱯᱟᱞᱮᱫ ᱟᱲᱟᱝ ᱤᱧ ᱟᱡᱚᱢ ᱠᱮᱜᱼᱟ ᱵᱮᱨᱮᱫ ᱞᱮᱱ ᱢᱮ ᱥᱮ ? ᱜᱤᱫᱽᱨᱟ.ᱭ ᱫᱟᱜ ᱥᱮᱱ ᱮᱫᱟ ᱯᱷᱟᱴᱠᱟᱨᱮᱫ ᱠᱟᱱᱟ ᱾ ᱵᱮᱨᱮᱫ ᱠᱟᱛᱮ ᱵᱩᱜᱤᱛᱤᱧ ᱮᱜᱮᱨ ᱵᱟᱲᱟ ᱠᱮᱫᱮᱭᱟ ᱾ ᱡᱟ.ᱯᱤᱫ ᱠᱮᱫᱟᱭ ᱾

" ᱴᱟᱠᱟ ᱫᱚᱢ ᱪᱮᱠᱟᱭᱟ ? "

ᱴᱟᱠᱟ ᱫᱚ ᱵᱟᱢ ᱡᱟᱞᱟ ᱾ ᱟᱯᱱᱟᱨ ᱛᱮᱜᱮᱠᱚ ᱮᱢᱚᱜᱠᱟᱱ ᱛᱟᱦᱮᱸ ᱠᱟᱱᱟ ᱾ ᱪᱮᱫᱟᱜ ᱵᱟᱢ ᱦᱮᱸ ᱞᱮᱫᱟ ᱾ ᱜᱷᱩᱥ ᱨᱮᱭᱟᱜ ᱴᱟᱠᱟ ᱛᱮ ᱫᱚ ᱡᱟᱦᱟᱸᱱ ᱠᱟ‌.ᱢᱤ ᱜᱮ ᱵᱟᱝ ᱦᱩᱭᱩᱜᱼᱟ᱾ ᱢᱮᱱᱠᱷᱟᱱ ᱜᱷᱩᱥ ᱛᱮ ᱜᱮ ᱱᱚᱣᱟ ᱫᱩᱱᱤᱭᱟ. ᱫᱚ ᱪᱟᱞᱟᱜ ᱠᱟᱱᱟ ᱾

ᱟᱢ ᱫᱟ ᱛᱷᱤᱨ ᱠᱟᱜ ᱢᱮ, ᱟᱞᱟᱢ ᱥᱤᱠᱷᱟ.ᱣᱤᱧᱟ ᱾ ᱤᱧᱟᱜ ᱥᱤᱫᱷᱟᱱᱛ ᱫᱚ ᱵᱟ.ᱧ ᱵᱟ.ᱜᱤᱭᱟ ᱾ ᱟᱢ ᱫᱚ ᱩᱞᱮᱢ ᱡᱚᱢᱟ ᱪᱮ ᱫᱟᱨᱮᱢ ᱞᱮᱠᱷᱟᱭᱟ ?

ᱤᱧ ᱫᱚ ᱩᱞ ᱦᱩᱧ ᱡᱚᱢᱟ ᱟᱨ ᱫᱟᱨᱮ ᱦᱚᱧ ᱞᱮᱠᱷᱟᱭᱟ ᱾ ᱴᱷᱤᱠᱟ ᱥᱮᱛᱟᱜ ᱠᱷᱟᱱᱮᱢ ᱞᱮᱠᱷᱟᱭᱟ ᱱᱟᱜ ᱾ ᱱᱤᱛ ᱫᱚ ᱧᱤᱫᱟ. ᱜᱮᱭᱟ ᱜᱤᱛᱤᱡ ᱠᱚᱜ ᱢᱮ ᱾ ᱟᱨ ᱵᱟᱱᱟᱦᱚᱲ ᱞᱤᱧ ᱡᱟ.ᱯᱤᱫ ᱠᱮᱫᱼᱟ ᱾ ᱫᱚᱥᱟᱨ ᱦᱤᱞᱚᱜ ᱥᱮᱛᱟᱜ ᱪᱟ ᱧᱩ ᱠᱟᱛᱮ ᱡᱚᱠᱷᱚᱱ ᱟᱢ ᱜᱳ ᱫᱚᱭ ᱢᱮᱛᱟᱫ ᱤᱧᱟ ᱢᱟ ᱟᱢ ᱫᱚ ᱛᱮᱦᱮᱸᱧ ᱫᱚ ᱦᱚᱴᱮᱞ ᱨᱮᱜᱮ ᱡᱚᱢ ᱢᱮ ᱾ ᱢᱚᱴᱷᱮ ᱯᱮ ᱯᱩᱣᱟ. ᱪᱟᱣᱞᱮ ᱢᱮᱱᱟᱜᱼᱟ ᱾ ᱥᱟᱦᱮᱵᱽ ᱠᱟᱱᱟᱢ ᱛᱚ ᱟᱨ ᱡᱟᱦᱟᱸᱭ ᱴᱠᱟ ᱠᱚ ᱮᱢᱟᱢ ᱠᱷᱟᱱ ᱫᱚ ᱟᱞᱚᱢ ᱦᱟᱛᱟᱣᱟ ᱾ ᱵᱷᱟ.ᱞᱟ.ᱭ ᱨᱮᱭᱟᱜ ᱜᱮ ᱠᱟ.ᱢᱤ ᱢᱮ ᱾ ᱟᱡᱚᱢ ᱠᱤᱫᱟ.ᱧ ᱟᱨ ᱚᱯᱷᱤᱥ ᱥᱮᱫ ᱤᱧ ᱢᱚᱦᱰᱟ ᱭᱮᱱᱟ ᱾ ᱦᱮᱸ ᱪᱟᱞᱟᱜ-ᱢᱮᱱᱷᱟᱜ ᱛᱤᱧ ᱢᱮᱱ ᱚᱴᱚ ᱣᱟᱫᱮᱭᱟ ᱯᱟᱴᱷᱚᱠ ᱰᱟᱠᱛᱟᱨ ᱴᱷᱮᱱ ᱪᱟᱞᱟᱣ ᱢᱮᱱᱦᱟᱜ ᱟᱨ ᱨᱟᱱ ᱠᱚᱭᱮᱢᱮ ᱾ ᱯᱩᱭᱥᱟ. ᱫᱚ ᱛᱟᱭᱱᱚᱢ ᱛᱤᱧ ᱮᱢᱟᱭᱟ ᱾

ᱚᱯᱷᱤᱥ ᱨᱮ ᱠᱟ.ᱢᱤ ᱵᱟᱲᱟ ᱠᱟᱛᱮ ᱥᱚᱡᱷᱮ ᱵᱟᱡᱟᱨ ᱥᱮᱫ ᱜᱤᱧ ᱢᱚᱦᱰᱟ ᱭᱮᱱᱟ ᱾ ᱵᱤᱨᱵᱷᱩᱢ ᱦᱚᱴᱮᱞ ᱨᱤᱧ ᱡᱚᱡᱚᱢ ᱠᱟᱱᱟ ᱾ ᱤᱧ ᱦᱚᱴᱮᱞ ᱨᱮ ᱫᱟᱠᱟ ᱡᱚᱡᱚᱢ ᱧᱮᱞ ᱛᱮ ᱵᱮᱥᱨᱟ ᱫᱚᱭ ᱠᱩᱞᱤ ᱠᱤᱫᱤᱣᱟ-ᱦᱚᱴᱮᱞ ᱨᱮᱢ ᱡᱚᱡᱚᱢ ᱠᱟᱱ ᱫᱚ ?

ᱢᱮᱛᱟᱫᱤᱭᱟ.ᱧ ᱢᱚᱴᱷᱮ ᱯᱮ ᱯᱩᱣᱟ. ᱪᱟᱣᱞᱮ ᱜᱮ ᱛᱟᱦᱮᱸ ᱠᱟᱱᱟ ᱾ ᱪᱮᱫ ᱦᱩᱭᱩᱜᱼᱟ ᱤᱱᱟ ᱛᱨ ᱫᱚ ᱾ ᱵᱮᱥᱨᱟ ᱫᱚᱭ ᱢᱨᱱ ᱠᱮᱫᱼᱟ ᱥᱟ.ᱨᱤᱭᱟᱜ ᱮᱢ ᱨᱚᱲ ᱮᱜᱼᱟ ?

ᱥᱟ.ᱨᱤᱭᱟᱜ ᱪᱷᱟᱰᱟ ᱛᱤᱥ ᱟ.ᱣᱲᱤᱭᱟᱜ ᱫᱩᱧ ᱨᱚᱲ ᱟᱠᱟᱫᱟ ? ᱢᱮᱱᱠᱷᱟᱱ ᱦᱚᱲ ᱵᱟᱠᱚ ᱯᱟ.ᱛᱭᱟ.ᱣᱜᱼᱟ ᱾

ᱯᱮᱼᱯᱮ ᱢᱚᱬᱮ ᱵᱚᱪᱷᱚᱨ ᱯᱚᱱᱛᱷᱟ ᱯᱩᱨᱟ.ᱣ ᱮᱱᱟ, ᱫᱷᱟ.ᱨᱛᱤ ᱨᱤᱱ ᱛᱤᱱᱟ.ᱜ ᱦᱚᱲ ᱪᱚ ᱯᱮ ᱯᱩᱣᱟ. ᱪᱟᱣᱞᱮ ᱦᱚᱸ ᱵᱟᱱᱟᱨ ᱚᱠᱛᱚ ᱵᱟᱵᱚ ᱧᱟᱢᱮᱫᱼᱟ ᱾

--- ᱵᱟᱞ ᱠᱤᱥᱚᱨ ᱵᱟᱥᱠᱮ ( ᱚᱨᱢᱟᱱ )