Agil hapram kowag Katha | आ़गील हापड़म कोवाग काथा | ᱟ.ᱜᱤᱞ ᱦᱟᱯᱲᱟᱢ ᱠᱟᱣᱟᱜ ᱠᱟᱛᱷᱟ

  Agil hapram kowag Katha | आ़गील हापड़म कोवाग काथा

ᱟ.ᱜᱤᱞ ᱦᱟᱯᱲᱟᱢ ᱠᱟᱣᱟᱜ ᱠᱟᱛᱷᱟ

ᱟ.ᱜᱤᱞ ᱦᱟᱯᱲᱟᱢ ᱠᱚ ᱠᱚ ᱞᱟ.ᱭ ᱟ.ᱜᱩ ᱣᱟᱠᱟᱫᱼᱟ ᱵᱟᱝ ᱢᱟ ᱚᱛ, ᱥᱮᱨᱢᱟ, ᱦᱚᱭ, ᱫᱟᱜ ᱡᱚᱛᱚ ᱜᱮ ᱢᱟᱨᱟᱝ ᱴᱷᱟ.ᱠᱩᱨᱟᱜ ᱥᱤᱨᱤᱡ ᱠᱟᱱᱟ᱾ ᱢᱟᱨᱟᱝ ᱴᱷᱟ.ᱠᱩᱨ ᱜᱮ ᱥᱟᱱᱟᱢ ᱞᱮᱠᱟᱱ ᱡᱟᱱᱣᱟ ᱪᱮ ᱡᱤᱱᱛᱤ ᱯᱤᱯᱤᱲᱤᱭᱟ.ᱝ ᱠᱚ ᱟᱨ ᱢᱟᱱᱣᱟ ᱦᱚᱯᱚᱱ ᱫᱚᱭ ᱥᱤᱨᱡᱟ.ᱣ ᱟᱠᱟᱫ ᱠᱚᱣᱟ ᱾ ᱩᱱᱤᱜᱮ ᱟ.ᱜ-ᱜᱩᱭᱤᱡ ᱫᱚ ᱟᱨ ᱩᱱᱤᱜᱮ ᱤᱜᱫᱤᱭᱤᱡ ᱫᱚ ᱾ ᱢᱟᱲᱟᱝ ᱫᱚ ᱜᱚᱴᱟ ᱢᱤᱨᱛᱤᱠᱟ ᱫᱟᱜ ᱜᱮ ᱛᱟᱦᱮᱸ ᱠᱟᱱᱟ ᱟᱨ ᱚᱱᱟ ᱫᱟᱜ ᱨᱮ ᱦᱚᱨᱚ ᱢᱟᱜᱟᱲ, ᱛᱟᱭᱟᱱ, ᱞᱮᱱᱰᱮᱫ, ᱠᱟᱴᱠᱚᱢ ᱟᱨ ᱦᱟᱠᱚ ᱮᱢᱟᱱ ᱫᱟᱜ ᱡᱟᱱᱣᱟ ᱠᱚ ᱛᱟᱦᱮᱸ ᱠᱟᱱᱟ ᱾ ᱦᱟᱥᱟ ᱫᱚ ᱫᱟᱜ ᱞᱟᱛᱟᱨ ᱨᱮ ᱛᱟᱦᱮᱸ ᱠᱟᱱᱟ ᱾ 
ᱠᱷᱟᱱ ᱜᱮ ᱢᱟᱨᱟᱝ ᱴᱷᱟ.ᱠᱩᱨ ᱫᱚ ᱠᱟᱛᱷᱟᱡ, ᱢᱟᱱᱣᱟ ᱦᱚᱯᱚᱱ ᱵᱮᱜ ᱱᱟᱣ ᱥᱟᱱᱟ ᱠᱮᱫᱮᱭᱟ ᱾ ᱟᱫᱚ ᱢᱟ.ᱞᱤᱱ ᱵᱩᱰᱷᱤ ᱵᱮᱱᱟᱣ ᱞᱟᱦᱟ ᱠᱮᱫᱮ ᱛᱮᱭ ᱟᱡᱟᱜ ᱠᱚᱲᱟᱢ ᱨᱮᱱᱟᱝ ᱢᱟ.ᱭᱞᱟ. ᱯᱩᱴᱤᱨ ᱚᱰᱚᱠ ᱠᱟᱛᱮᱭ ᱢᱮᱱ ᱠᱮᱫᱼᱟ --- ᱤᱧ ᱢᱩᱴᱷᱟ.ᱱ ᱵᱟᱨᱭᱟ ᱢᱟᱱᱣᱟ ᱵᱮᱱᱟᱣ ᱠᱤᱱ ᱢᱮ ᱾ ᱵᱮᱱᱟᱣ ᱠᱤᱱ ᱯᱚᱨᱮ ᱢᱟᱝ ᱴᱷᱟ.ᱠᱩᱨ ᱡᱤᱣᱤᱭ ᱮᱢᱟᱫ ᱠᱤᱱᱟ ᱾ ᱴᱷᱟ.ᱠᱩᱨ ᱫᱚ ᱢᱟ.ᱞᱤᱱ ᱵᱩᱰᱷᱤ ᱚᱱᱟ ᱚᱲᱟᱜ ᱛᱮ ᱵᱚᱞᱚᱱ ᱮ ᱢᱮᱛᱟᱫᱮᱭᱟ ᱾ ᱚᱱᱰᱮ ᱜᱮ ᱡᱤᱣᱤ ᱫᱚ ᱢᱮᱱᱟᱜᱼᱟ ᱾ ᱥᱟᱛᱮ ᱨᱮᱭᱟᱜ ᱫᱚ ᱟᱞᱚᱢ ᱟ.ᱜᱩᱭᱟ ᱥᱮᱱᱮᱨ ᱨᱮᱭᱟᱜ ᱜᱮ ᱟ.ᱜᱩᱭ ᱢᱮ᱾ ᱢᱟ.ᱞᱤᱱ ᱵᱩᱰᱷᱤ ᱫᱚ ᱜᱤᱰᱨᱤᱜᱮᱭ ᱛᱟᱦᱮᱸ ᱞᱮᱱᱟ ᱥᱮᱱᱮᱨ ᱨᱮᱱᱟᱝ ᱫᱚ ᱵᱟᱭ ᱥᱮᱴᱮᱨ ᱞᱮᱫᱼᱟ ᱾ ᱚᱱᱟ ᱫᱤᱭᱟ. ᱛᱮ ᱥᱟᱛᱮ ᱨᱮᱭᱟᱜ ᱜᱮᱭ ᱧᱟᱢ ᱟ.ᱜᱩ ᱠᱮᱫᱼᱟ ᱟᱨ ᱩᱱᱠᱤᱱ ᱢᱟᱱᱣᱟ ᱡᱤᱣᱤᱭ ᱮᱢᱟᱫ ᱠᱤᱱᱟ᱾ ᱧᱮᱞ ᱢᱮᱥᱮ ᱡᱤᱣᱤ ᱧᱟᱢ ᱥᱟᱶᱛᱮ ᱩᱱᱠᱤᱱ ᱢᱟ.ᱠᱤᱱ ᱪᱮᱬᱮ ᱜᱚᱫ ᱮᱱ, ᱟᱨ ᱠᱤᱱ ᱩᱰᱟᱣ ᱮᱱᱟ ᱾ ᱥᱟᱛᱮ ᱨᱮᱭᱟᱜ ᱡᱤᱣᱤ ᱫᱚ ᱪᱮᱬᱮ ᱢᱤᱣᱤ ᱛᱟᱦᱮᱸ ᱠᱟᱱᱟ ᱾ 
ᱟᱫᱚᱢ ᱫᱚ ᱠᱚ ᱢᱮᱱᱟ ᱢᱟᱨᱟᱝ ᱴᱷᱟ.ᱠᱩᱨ ᱫᱚ ᱦᱟᱥᱟ ᱨᱤᱱ ᱢᱟᱱᱣᱟᱭ ᱵᱮᱱᱟᱣ ᱞᱮᱫ ᱠᱤᱱ ᱛᱟᱦᱮᱸ ᱠᱟᱱᱟ ᱾ ᱢᱮᱱ ᱠᱷᱟᱱ ᱨᱚᱦᱚᱲ ᱞᱟ.ᱜᱤᱫ ᱥᱤᱛᱩᱝ ᱨᱮᱭ ᱛᱟᱥᱮ ᱞᱮᱫ ᱠᱤᱱᱟ ᱩᱱ ᱨᱮ ᱥᱤᱧ-ᱥᱟᱫᱚᱢ ᱫᱟᱜ ᱧᱩ ᱠᱤᱱ ᱟᱬᱜᱚ ᱞᱮᱱᱟᱠᱤᱱ ᱩᱱ ᱨᱮ ᱞᱮᱵᱮᱫ ᱜᱮᱡᱮᱨ ᱠᱟᱫ ᱠᱤᱱᱟᱠᱚ ᱾ ᱠᱷᱟᱱ ᱜᱮ ᱢᱟᱨᱟᱝ ᱴᱷᱟ.ᱠᱩᱨ ᱫᱚ ᱟᱡᱟᱜ ᱠᱚᱲᱟᱢ ᱠᱷᱚᱱ ᱢᱟ.ᱭᱞᱟ. ᱯᱩᱴᱤᱨ ᱚᱰᱚᱠ ᱠᱟᱛᱮ ᱵᱟᱨᱭᱟ ᱪᱮᱬᱮᱭ ᱵᱮᱱᱟᱣ ᱠᱮᱫ ᱠᱤᱱᱟ ᱾ ᱟᱡ ᱦᱚᱸ ᱪᱮᱬᱮ ᱜᱮᱭ ᱵᱮᱱᱟᱣ ᱠᱮᱫ ᱠᱤᱱᱟ --- ᱦᱟᱸᱥ-ᱦᱟ.ᱥᱞᱤ ᱪᱮᱬᱮ ᱾
ᱟᱫᱚ ᱚᱛ ᱢᱟ ᱚᱠᱟ ᱨᱮᱦᱚᱸ ᱵᱟᱝ ᱛᱟᱦᱮᱸ ᱠᱟᱱᱟ, ᱚᱠᱟ ᱨᱮᱠᱮᱱ ᱟᱵᱚᱜᱼᱟ, ᱚᱱᱟ ᱞᱮᱠᱟᱨᱮ ᱦᱟᱸᱥ-ᱦᱟ.ᱥᱞᱤ ᱪᱮᱬᱮ ᱥᱤᱧ-ᱧᱤᱫᱟ. ᱠᱤᱱ ᱩᱰᱟ.ᱣ ᱵᱟᱲᱟᱭᱮᱱᱟ ᱾ ᱫᱚᱜ ᱛᱮᱛᱟᱝ ᱠᱮᱫ ᱠᱤᱱ ᱠᱷᱟᱱ ᱫᱚᱜ ᱠᱤᱱ ᱧᱩ ᱠᱮᱫᱼᱟ ᱮᱱᱠᱷᱟᱱ ᱢᱚᱪᱟ ᱨᱮᱱᱟᱝ ᱯᱷᱚᱛᱚ ᱫᱟᱜ ᱨᱮ ᱧᱩᱨᱮᱱᱟ ᱟᱫᱚ ᱢᱟᱨᱟᱝ ᱴᱷᱟ.ᱠᱩᱨ ᱫᱟᱜ ᱨᱮᱦᱚᱸ ᱟᱲᱜᱚᱱ ᱨᱮᱱᱟᱝ ᱠᱟᱦᱮᱫ ᱮ ᱚᱝ ᱠᱟᱫ ᱟᱫᱚ ᱫᱟᱜ ᱨᱮᱦᱚᱸ ᱜᱚᱴᱟ ᱠᱤᱱ ᱯᱟᱭᱨᱟ ᱵᱟᱲᱟᱭᱮᱱᱟ ᱾ ᱟ.ᱛᱩ-ᱟ.ᱛᱩ ᱛᱮ ᱫᱚᱜ ᱨᱮᱱᱟᱝ ᱯᱷᱚᱛᱚ ᱫᱚ ᱥᱮᱭᱟᱞᱚᱢ ᱨᱮ ᱴᱷᱟᱠᱮᱫ ᱮᱱᱟ ᱾ ᱴᱷᱟ.ᱠᱩᱨ ᱫᱚ ᱚᱱᱟ ᱥᱟᱭᱟᱞᱚᱢ ᱠᱷᱚᱱ ᱥᱤᱨᱚᱢ ᱮ ᱡᱟᱱᱟᱢ ᱠᱮᱫᱼᱟ ᱾ ᱦᱟᱸᱥ-ᱦᱟ.ᱥᱞᱤ ᱪᱮᱬᱮ ᱫᱚ ᱥᱤᱨᱚᱢ ᱪᱟᱨᱮᱡ ᱛᱮ ᱛᱩᱠᱟ. ᱠᱤᱱ ᱵᱮᱱᱟᱣ ᱠᱮᱫ ᱟᱨ ᱵᱟᱨᱭᱟ ᱠᱤᱱ ᱵᱤᱠᱤ ᱠᱮᱫ ᱚᱱᱟ ᱵᱤᱞᱤ ᱠᱷᱚᱱ ᱵᱟᱨᱭᱟ ᱢᱟᱱᱣᱟ ᱦᱚᱯᱚᱱ ᱠᱤᱱ ᱵᱩᱥᱟ.ᱲᱮᱱ ᱾ ᱦᱟᱸᱥ-ᱦᱟ.ᱥᱞᱤ ᱵᱷᱟᱵᱱᱟ ᱦᱮᱡ ᱟᱫ ᱠᱤᱱᱟ ᱡᱮ ----- 
ᱦᱟᱭ-ᱦᱟᱭ ᱡᱟᱞᱟᱯᱩᱨᱤ ᱨᱮ ! 
ᱦᱟᱭᱼᱦᱟᱭ ᱱᱩᱠᱤᱱ ᱢᱟᱱᱣᱟ ! 
ᱦᱟᱭ-ᱦᱟᱭ ᱵᱩᱥᱟ.ᱲ ᱟᱠᱟᱱ ᱠᱤᱱ !
ᱦᱟᱭᱼᱦᱟᱭ ᱱᱩᱠᱤᱱ ᱢᱟᱱᱣᱟ !
ᱦᱟᱭ-ᱦᱟᱭ ᱛᱚᱠᱟᱨᱮ ᱫᱚᱦᱚᱠᱤᱱ ? 
ᱦᱟᱭ-ᱦᱟᱭ ᱫᱮᱥᱮ ᱞᱟ.ᱭ ᱵᱤᱱ 
ᱦᱟᱭ-ᱦᱟᱭ ᱢᱟᱨᱟᱝ ᱴᱷᱟ.ᱠᱩᱨ 
ᱦᱟᱭ-ᱦᱟᱭ ᱵᱩᱥᱟ.ᱲ ᱟᱠᱟᱱ ᱠᱤᱱ 
ᱦᱟᱭ-ᱦᱟᱭ ᱛᱚᱠᱟᱨᱮ ᱫᱚᱦᱚᱠᱤᱱ ᱾
ᱢᱟᱨᱟᱝ ᱴᱷᱟ.ᱠᱩᱨ ᱦᱟᱸᱥ-ᱦᱟ.ᱥᱞᱤ ᱡᱤᱣᱤ ᱭᱟᱜ ᱱᱮᱦᱚᱨ ᱟᱡᱚᱢ ᱠᱟᱛᱮ, ᱚᱛ ᱵᱮᱱᱟᱣ ᱮ ᱢᱮᱱ ᱠᱮᱫᱼᱟ ᱾ ᱢᱟᱨᱟᱝ ᱴᱷᱟ.ᱠᱩᱨ ᱫᱟᱜ ᱡᱟᱱᱣᱟᱨ ᱠᱚᱭ ᱦᱚᱦᱚ ᱣᱟᱫ ᱠᱚᱣᱟ ᱟᱨ ᱫᱟᱜ ᱞᱟᱛᱟᱨ ᱦᱟᱥᱟ ᱨᱟᱠᱟᱵ ᱨᱮᱱᱟᱝ ᱠᱟᱛᱷᱟᱭ ᱢᱮᱛᱟᱫ ᱠᱚᱣᱟ ᱾ ᱥᱟᱱᱟᱢ ᱡᱟᱱᱣᱟ ᱯᱟ.ᱨᱤ-ᱯᱟ.ᱨᱤ ᱛᱮ ᱦᱟᱥᱟ ᱠᱚ ᱨᱟᱠᱟᱵ ᱠᱮᱫᱼᱟ, ᱢᱮᱱᱠᱷᱟᱱ ᱦᱟᱥᱟ ᱵᱟᱝ ᱠᱚ ᱨᱟᱠᱟᱵ ᱫᱟᱲᱮᱭᱟᱫᱼᱟ ᱾ ᱢᱩᱪᱟ.ᱫ ᱨᱮ ᱞᱮᱱᱰᱮᱫ ᱨᱟᱡᱟ ᱠᱚ ᱢᱮᱛᱟᱫᱮᱭᱟ ᱦᱟᱥᱟ ᱨᱟᱠᱟᱵ ᱟᱫᱚ ᱦᱚᱨᱚ ᱫᱮᱭᱟ ᱪᱮᱛᱟᱱ ᱨᱮ ᱦᱟᱥᱟ ᱨᱟᱠᱟᱵ ᱠᱟᱛᱮ ᱚᱛ ᱫᱷᱟ.ᱨᱛᱤ ᱯᱩᱨᱤ ᱫᱚ ᱵᱮᱱᱟᱣᱮᱱᱟ ᱾ ᱩᱱ ᱨᱮ ᱢᱟᱨᱟᱝ ᱴᱷᱟ.ᱠᱩᱛᱮ ᱢᱮᱱ ᱞᱮᱫᱼᱟ ᱫᱷᱟ.ᱨᱛᱤ ᱵᱮᱱᱟᱣᱮᱱᱟ ᱢᱟ ᱮᱱ ᱫᱚ ᱛᱟᱦᱮᱱ ᱯᱮ ᱾ ᱦᱟᱸᱥ-ᱦᱟ.ᱥᱞᱤ ᱪᱮᱬᱮ ᱦᱚᱸ ᱪᱟᱸᱫᱚ ᱦᱟ.ᱥᱩᱨ ᱥᱮᱫ ᱠᱚᱭᱚᱜ ᱠᱟᱛᱮ ᱦᱤᱦᱤᱲᱤ-ᱯᱤᱯᱤᱲᱤ ᱠᱤᱱ ᱪᱤᱭᱟ. ᱠᱮᱫᱼᱟ ᱟᱨ ᱩᱱᱠᱤᱱ ᱢᱟᱱᱣᱟ ᱦᱚᱸ ᱚᱱᱰᱮ ᱤᱫᱤ ᱚᱴᱚ ᱠᱟᱫ ᱠᱤᱱᱟ ᱾ ᱟ.ᱜᱤᱞ ᱦᱟᱯᱲᱟᱢ ᱠᱟᱣᱟᱜ ᱠᱟᱛᱷᱟ ᱞᱮᱠᱟᱛᱮ ᱯᱩᱭᱞᱩ ᱢᱟᱱᱣᱟ ᱦᱚᱯᱚᱱ ᱫᱚ ᱦᱤᱦᱤᱲᱤ-ᱯᱤᱯᱤᱲᱤ ᱨᱮᱠᱚ ᱛᱟᱦᱮᱸ ᱠᱟᱱᱟ ᱾ ᱦᱟᱸᱥ-ᱦᱟ.ᱥᱞᱤ ᱵᱤᱞᱤ ᱡᱚᱠᱷᱚᱱ ᱵᱟᱨᱭᱟ ᱢᱟᱱᱣᱟ ᱠᱤᱱ ᱡᱟᱱᱟᱢ ᱞᱮᱱ ᱫᱚ ᱩᱱᱠᱤᱱ ᱫᱚ ᱯᱤᱞᱪᱩ ᱦᱟᱲᱟᱢ- ᱯᱤᱞᱪᱩ ᱵᱩᱲᱦᱤ ᱧᱩᱛᱩᱢ ᱛᱮᱠᱤᱱ ᱵᱤᱠᱟ.ᱣ ᱞᱮᱱᱟ ᱾ ᱦᱤᱦᱤᱲᱤ-ᱯᱤᱯᱤᱲᱤ ᱨᱮ ᱛᱟᱦᱮᱸ ᱠᱟᱛᱮ ᱟ.ᱰᱤ ᱫᱤᱱ ᱠᱤᱱ ᱛᱟᱦᱮᱸ ᱞᱮᱱᱟ ᱚᱱᱟᱰᱮ ᱠᱷᱚᱱ ᱮᱭᱟᱭ ᱠᱚᱲᱟ ᱟᱨ ᱮᱭᱟᱭ ᱠᱩᱲᱤ ᱠᱚ ᱦᱩᱭᱮᱱ ᱛᱟ.ᱠᱤᱱᱟ ᱾ ᱩᱱᱠᱩ ᱫᱚ ᱚᱱᱰᱮ ᱜᱮᱠᱚ ᱦᱟᱨᱟ-ᱵᱩᱨᱩ ᱭᱮᱱᱟ ᱾ ᱠᱚᱲᱟ ᱫᱚ ᱫᱤᱱᱟᱢ ᱦᱤᱞᱚᱜ ᱥᱮᱸᱫᱨᱟ ᱠᱚ ᱪᱟᱞᱟᱜ ᱟᱨ ᱠᱩᱲᱤ ᱫᱚ ᱫᱤᱱᱟ.ᱢ ᱦᱤᱞᱚᱜ ᱟᱲᱟᱜ ᱥᱤᱫ ᱠᱚ ᱪᱟᱞᱟᱜ ᱠᱟᱱ ᱛᱟᱦᱮᱸᱫ ᱾ ᱢᱤᱫ ᱫᱤᱱ ᱫᱚ ᱦᱟᱲᱟᱢ ᱫᱚ ᱠᱷᱟᱱᱰᱮᱨᱟᱭ ᱵᱤᱨ ᱛᱮ ᱥᱮᱸᱫᱨᱟᱭ ᱤᱫᱤ ᱠᱮᱫ ᱠᱚᱣᱟ ᱟᱨ ᱵᱩᱲᱦᱤ ᱫᱚ ᱥᱩᱲᱩᱠᱩᱡ ᱵᱤᱨ ᱛᱮ ᱥᱟᱠᱟᱢ ᱦᱮᱡ ᱮ ᱤᱫᱤ ᱠᱮᱫ ᱠᱚ ᱠᱷᱟᱱ ᱟ.ᱰᱤ ᱫᱤᱱ ᱠᱚ ᱟᱯᱟᱫ ᱮᱱᱟ ᱾ 
ᱢᱤᱫ ᱫᱤᱱ ᱠᱩᱲᱤ ᱦᱚᱯᱚᱱ ᱪᱟᱯᱟᱠᱤᱭᱟ ᱵᱟᱲᱮ ᱫᱟᱨᱮ ᱵᱩᱴᱟ. ᱨᱮ ᱡᱤᱨᱟ.ᱣ ᱚᱠᱛᱚ ᱥᱮᱨᱮᱧ ᱫᱩᱨᱟᱝ ᱠᱟᱱ ᱛᱟᱦᱮᱸᱫ, ᱩᱱ ᱚᱠᱛᱚ ᱠᱚᱲᱟ ᱠᱚᱦᱚᱸ ᱥᱮᱸᱫᱨᱟ-ᱥᱮᱸᱫᱨᱟ ᱛᱮ ᱚᱸᱰᱮ ᱠᱚ ᱥᱮᱴᱮᱨᱮᱱᱟ ᱾ ᱟᱫᱚ ᱠᱚ ᱧᱟᱯᱟᱢᱮᱱᱟ ᱾ ᱡᱟ.ᱛᱤ ᱯᱟ.ᱨᱤᱥ ᱠᱚ ᱠᱩᱯᱩᱞᱤᱭᱮᱱᱟ, ᱠᱚᱲᱟ ᱦᱚᱯᱚᱱ ᱫᱚ ᱟᱠᱚᱣᱟᱜ ᱡᱟ.ᱛᱤ ᱠᱚᱪᱮ ᱠᱟᱬᱰᱟ ᱦᱮᱥᱮᱞ ᱯᱟᱭᱲᱟ ᱠᱚ ᱞᱟ.ᱭᱱᱠᱮᱫ ᱟᱨ ᱠᱩᱲᱤ ᱦᱚᱯᱚᱱ ᱠᱚᱫᱚ ᱨᱮᱭᱟᱲ ᱠᱟᱬᱵᱟ ᱠᱤᱛᱟ. ᱠᱟ.ᱦᱰᱩᱢ ᱠᱚ ᱞᱟ.ᱭ ᱠᱮᱫ ᱾ ᱱᱚᱣᱟ ᱞᱮᱠᱟᱨᱮ ᱩᱱᱠᱩᱣᱟᱜ ᱡᱟ.ᱛᱤ ᱯᱟ.ᱨᱤᱥ ᱡᱩᱫᱟ. ᱡᱩᱫᱟ. ᱠᱟ ᱞᱟ.ᱭ ᱠᱮᱫ ᱨᱮ ᱚᱱᱟ ᱥᱩᱲᱩᱠᱩᱡ ᱵᱤᱨ ᱨᱮᱜᱮ ᱠᱚ ᱵᱟᱯᱞᱟᱭᱮᱱᱟ ᱾ ᱚᱱᱟ ᱫᱤᱭᱟ ᱛᱮ ᱵᱟᱭᱦᱟ ᱵᱚᱭᱦᱟ ᱟᱠᱚ ᱠᱚ ᱵᱟᱯᱞᱟ ᱢᱟ ᱢᱮᱱ ᱛᱮ ᱯᱟ.ᱨᱤᱥ ᱠᱤᱱ ᱦᱟ.ᱴᱤᱧᱟᱫ ᱠᱚᱣᱟ --- ᱦᱟᱥᱸᱫᱟᱜ, ᱢᱩᱨᱢᱩ, ᱠᱤᱥᱠᱩ, ᱦᱮᱱᱵᱽᱨᱚᱢ, ᱢᱟ.ᱨᱰᱤ, ᱥᱚᱨᱮᱱ ᱟᱨ ᱴᱩᱰᱩ᱾ ᱮᱭᱟᱭ ᱵᱚᱭᱦᱟ ᱮᱭᱟᱭ ᱯᱟ.ᱨᱤᱥ ᱛᱮᱠᱚ ᱵᱷᱮᱜᱟᱨ ᱞᱮᱱᱟ ᱾ 
ᱦᱤᱦᱤᱲᱤ-ᱯᱤᱯᱤᱲᱤ ᱨᱮ ᱵᱷᱮᱨ ᱫᱤᱱ ᱠᱚ ᱛᱟᱦᱮ ᱭᱮᱱ ᱯᱚᱨᱮ ᱠᱷᱚᱡ ᱠᱟᱢᱟᱱ ᱛᱮᱠᱚ ᱥᱮᱱ ᱮᱱᱟ ᱚᱸᱰᱮ ᱠᱷᱚᱱ ᱥᱟᱥᱟᱝ ᱵᱮᱲᱟ ᱛᱮᱠᱚ ᱪᱟᱞᱟᱣᱮᱱᱟ ᱾ ᱥᱟᱥᱟᱝ ᱵᱮᱲᱟ ᱨᱮ ᱟ.ᱰᱤ ᱢᱟᱨᱟᱝ ᱴᱟᱺᱰᱤ ᱛᱟᱦᱮᱸ ᱠᱟᱱᱟ ᱾ ᱩᱱᱠᱩ ᱮᱭᱟᱭ ᱯᱟ.ᱨᱤᱥ ᱪᱷᱟᱰᱟ ᱟᱨᱦᱚᱸ ᱢᱟᱬᱮ ᱯᱟ.ᱨᱤᱨ ᱠᱟ ᱦᱟ.ᱴᱤ ᱧᱮᱱᱟ --- ᱵᱟᱥᱠᱮ, ᱰᱮᱥᱨᱟ, ᱯᱟᱶᱨᱤᱭᱟ. ᱪᱚᱬᱮ ᱟᱨ ᱰᱮᱫᱽᱭᱟ. ᱾ ᱱᱚᱝᱠᱟ ᱞᱮᱠᱟᱛᱮ ᱜᱮᱞᱵᱟᱨ ᱯᱟ.ᱨᱤᱥ ᱠᱚ ᱦᱩᱭᱮᱱᱟ ᱾ ᱫᱤᱱ-ᱫᱤᱱ ᱛᱮ ᱦᱚᱲ ᱠᱚᱦᱚᱸ ᱠᱚ ᱥᱟᱸᱜᱮ ᱤᱫᱤᱭᱮᱱᱟ ᱾ ᱠᱷᱟᱱ ᱜᱮ ᱥᱟᱥᱟᱝ ᱵᱮᱲᱟ ᱠᱷᱚᱱ ᱡᱟ.ᱨᱯᱤ ᱫᱤᱥᱚᱢ ᱛᱮ ᱚᱸᱰᱮ ᱠᱷᱚᱱ ᱫᱚ ᱟᱭᱨᱮ ᱫᱤᱥᱚᱢ ᱨᱮ ᱟᱨ ᱚᱸᱰᱮ ᱠᱷᱚᱱ ᱫᱚ ᱠᱚᱭᱰᱮ ᱫᱤᱥᱚᱢ ᱛᱮᱠᱚ ᱩᱪᱟ.ᱲ ᱪᱟᱞᱟᱣᱮᱱᱟ ᱾ ᱢᱮᱱ ᱠᱷᱚᱱ ᱚᱱᱟ ᱡᱟᱭᱜᱟ ᱠᱚ ᱚᱠᱟ ᱠᱚᱨᱮ ᱢᱮᱱᱟᱜᱼᱟ ᱱᱤᱛ ᱦᱚᱸ ᱚᱠᱚᱭ ᱦᱚᱸ ᱵᱟᱝ ᱠᱚ ᱞᱟ.ᱭ ᱫᱚᱲᱮᱭᱟᱜ ᱠᱟᱱᱟ ᱾ ᱦᱩᱭᱫᱟᱲᱮᱭᱟᱜᱼᱟ ᱡᱟᱦᱟᱸ ᱛᱤᱥᱚᱜ ᱱᱚᱣᱟ ᱡᱟᱭᱜᱟ ᱠᱚ ᱪᱤᱭᱟ. ᱧᱟᱢᱚᱜᱼᱟ ᱾ 
ᱟ.ᱜᱤᱞ ᱦᱟᱯᱲᱟᱢ ᱠᱚ ᱚᱠᱟ ᱫᱤᱥᱚᱢ ᱨᱮᱱᱟᱝ ᱠᱟᱛᱷᱟ ᱵᱷᱟ‌ᱜᱤ ᱜᱚ ᱞᱟ.ᱭ ᱜᱟᱱᱟ ᱛᱟᱦᱮᱸᱱ ᱾ ᱢᱮᱱᱠᱷᱟᱱ ᱪᱟ.ᱭ ᱪᱟᱢᱯᱟ ᱚᱠᱟᱨᱮ ᱛᱟᱦᱮᱸᱠᱟᱱᱟ, ᱱᱚᱣᱟ ᱦᱚᱸ ᱱᱤᱛ ᱦᱟ.ᱵᱤᱡ ᱫᱚ ᱵᱟᱝ ᱵᱟᱰᱟᱭᱚᱜ ᱠᱟᱱᱟ ᱾ ᱟᱫᱚᱢ ᱦᱚᱲ ᱫᱚᱠᱚ ᱢᱮᱱᱟ ᱵᱟᱝ ᱢᱟ ᱚᱱᱟ ᱫᱚ ᱯᱟᱸᱡᱟᱵᱽ ᱥᱩᱵᱟ. ᱨᱮ ᱛᱟᱦᱮᱸᱠᱟᱱᱟ, ᱢᱮᱱᱠᱷᱟᱱ ᱟᱫᱚᱢ ᱫᱚᱠᱚ ᱢᱮᱱᱟ ᱵᱷᱚᱜᱚᱞ ᱯᱩᱨ ᱡᱤᱞᱟ. ᱨᱮᱱᱟᱝ ᱱᱟᱛᱷ ᱱᱚᱜᱚᱨ ᱟᱲᱮ ᱯᱟᱥᱮ ᱨᱮ ᱛᱟᱦᱮᱸᱠᱟᱱᱟ ᱾ ᱪᱟᱡᱯᱟ ᱫᱤᱥᱚᱢ ᱫᱚ ᱟᱵᱚ ᱫᱤᱥᱚᱢ ᱠᱷᱚᱱ ᱥᱟᱢᱟᱝ ᱱᱟᱠᱷᱟ ᱨᱮ ᱛᱟᱦᱮᱸᱠᱟᱱᱟ ᱾ ᱪᱟ.ᱭ-ᱪᱟᱢᱯᱟ ᱫᱤᱥᱚᱢ ᱨᱮ ᱫᱚ ᱢᱮᱱᱟᱠᱚ ᱚᱵᱚ ᱦᱚᱲ ᱦᱚᱯᱚᱱ ᱟ.ᱰᱤ ᱫᱤᱱ ᱠᱚ ᱛᱟᱦᱮᱸ ᱠᱟᱱᱟ ᱟᱨ ᱟ.ᱰᱤ ᱠᱚ ᱥᱟᱸᱜᱮ ᱭᱮᱱᱟ ᱾ ᱚᱱᱟ ᱫᱤᱥᱚᱢ ᱫᱚ ᱠᱚᱭᱰᱮ ᱫᱤᱥᱚᱢ ᱠᱷᱚᱱ ᱠᱚ ᱦᱮᱡ ᱞᱮᱱᱟ ᱾ ᱟᱨᱦᱚᱸ ᱠᱚ ᱞᱟ.ᱭᱟ ᱪᱟᱢᱯᱟ ᱫᱤᱥᱚᱢ ᱨᱮ ᱠᱤᱥᱠᱩ ᱦᱚᱲ ᱠᱚ ᱨᱟᱡ ᱞᱮᱫᱼᱟ ᱟᱨ ᱢᱩᱨᱢᱩ ᱠᱚᱫᱚ ᱱᱟᱭᱠᱮ ᱠᱚ ᱛᱟᱦᱮᱸ ᱠᱟᱱᱟ, ᱢᱟ.ᱨᱰᱤ ᱠᱚ ᱫᱚ ᱠᱤᱥᱟᱬ ᱦᱚᱲ ᱠᱚ ᱛᱟᱦᱮᱸ ᱠᱟᱱᱟ, ᱦᱮᱢᱵᱽᱨᱚᱢ ᱠᱚᱫᱚ ᱠᱩᱣᱟ.ᱨ ᱟᱨ ᱴᱩᱰᱩ ᱠᱚᱫᱚ ᱢᱟ.ᱫᱟ.ᱲᱤᱭᱟ. ᱦᱚᱲ ᱠᱚ ᱛᱟᱦᱮᱸ ᱞᱮᱱᱟ ᱾ ᱵᱟᱥᱠᱮ ᱯᱟ.ᱨᱤᱥ ᱨᱤᱱ ᱦᱚᱲ ᱠᱚᱫᱚ ᱵᱮᱯᱟᱨᱤ ᱦᱚᱲ ᱠᱚ ᱛᱟᱦᱮᱸ ᱠᱟᱱᱟ ᱾ ᱱᱚᱣᱟ ᱪᱟᱰᱟ ᱟᱨᱦᱚᱸ ᱜᱟᱲ ᱠᱚ ᱦᱚᱸ ᱛᱟᱦᱮᱸ ᱠᱟᱱᱟ ᱵᱷᱮᱜᱟᱨ-ᱵᱷᱮᱜᱟᱨ ᱯᱟ.ᱨᱤᱥ ᱨᱤᱱ ᱦᱟᱲ ᱠᱚ ᱰᱷᱮᱭᱟᱨ ᱰᱷᱮᱜᱟᱨ ᱜᱟᱲ ᱠᱚ ᱵᱮᱨᱮᱫ ᱞᱮᱫᱼᱟ ᱾ 
-------ᱯᱟ.ᱨᱤᱥ ᱟᱨ ᱜᱟᱲ ᱠᱚ-------
ᱠᱤᱥᱠᱩ -- ᱠᱚᱭᱰᱟ ᱜᱟᱲ 
ᱢᱟ.ᱨᱰᱤ -- ᱵᱟᱫᱚᱞᱤ ᱜᱟᱲ
ᱢᱩᱨᱢᱩ -- ᱪᱟᱢᱯᱟ ᱜᱟᱲ 
ᱦᱟᱸᱥᱫᱟᱜ -- ᱢᱟᱭᱱᱚ ᱢᱟ.ᱛᱤ ᱜᱟᱲ
ᱢᱟᱨᱮ ᱦᱟᱯᱲᱟᱢ ᱠᱚᱣᱟᱜ ᱥᱚᱦᱨᱟᱭ ᱥᱮᱨᱮᱧ ᱨᱮ ᱥᱤᱢᱟ. ᱚᱛ ᱦᱟᱥᱟ ᱞᱟ.ᱜᱤ ᱛᱮ ᱠᱚᱭᱰᱟ ᱜᱟᱲ ᱟᱨ ᱵᱟᱫᱚᱞᱤ ᱜᱟᱲ ᱞᱟ.ᱜᱤᱫ ᱛᱮ ᱵᱩᱜᱤᱛᱮ ᱠᱚ ᱨᱮᱯᱮᱡ ᱛᱟᱯᱟᱢ ᱜᱚᱯᱚᱡ ᱠᱟᱱᱟ --
ᱵᱮᱨᱮᱫ--ᱵᱮᱨᱮᱫ ᱢᱮᱥᱮ ᱜᱟ.ᱛᱤᱧ ᱦᱚᱸ 
ᱪᱤᱨᱜᱟ.ᱞ-ᱪᱤᱨᱜᱟ.ᱞᱚᱜ ᱢᱮᱥᱮ ᱜᱟ.ᱛᱤᱧ ᱦᱚ ᱾
ᱵᱚᱭᱰᱟ ᱠᱚ ᱢᱟᱯᱟᱜ ᱜᱚᱯᱚᱡ ᱠᱟᱱᱟ ᱾ 
ᱪᱮᱛᱮ ᱞᱟ.ᱜᱤᱫ ᱢᱟᱯᱟᱜ ᱠᱟᱱᱟ ᱜᱟ.ᱛᱤᱧ ᱦᱚ ?
ᱪᱮᱛᱮ ᱞᱟ.ᱜᱤᱫ ᱠᱚ ᱜᱚᱯᱚᱡ ᱠᱟᱱᱟ ᱜᱟ.ᱛᱤᱧ ᱦᱚ ?
ᱪᱮᱛᱮ ᱞᱟ.ᱜᱤᱫ ᱠᱚ ᱢᱟᱯᱟᱜ ᱜᱚᱯᱚᱡ ᱠᱟᱱᱟ ?
ᱥᱤᱡᱟ. ᱞᱟ.ᱜᱤᱫ ᱠᱚ ᱢᱟᱯᱟᱜ ᱜᱚᱯᱚᱡ ᱠᱟᱱᱟ ᱜᱟ‌ᱛᱤᱧ ᱦᱚᱸ ?
ᱴᱟᱺᱰᱤ ᱞᱟ.ᱜᱤᱫ ᱠᱚ ᱜᱚᱯᱚᱡ ᱠᱟᱱᱟ ᱜᱟ.ᱛᱤᱧ ᱦᱚᱸ ᱾
ᱵᱟᱫᱚᱞᱤ ᱠᱚ ᱢᱟᱯᱟᱜ ᱜᱟᱯᱚᱡ ᱠᱟᱱᱟ ᱿(ᱥᱚᱦᱨᱟᱭ ᱥᱮᱨᱮᱧ ) 
ᱟᱨᱦᱚᱸ ᱠᱚ ᱢᱮᱱᱟ ᱪᱟᱢᱯᱟ ᱫᱤᱥᱚᱢ ᱨᱮ ᱦᱟᱯᱲᱟᱢ ᱠᱚᱣᱟᱜ ᱞᱟ.ᱭ ᱞᱮᱠᱟᱛᱮ ᱠᱩᱞᱦᱤ ᱢᱩᱪᱟ.ᱫ ᱨᱮ ᱢᱟᱨᱟᱝ ᱵᱩᱨᱩ ᱢᱚᱬᱮ ᱠᱚ ᱛᱩᱨᱩᱭ ᱠᱚ, ᱡᱟᱦᱮᱨ ᱮᱨᱟ ᱠᱚ ᱵᱚᱸᱜᱟ ᱟᱠᱚᱣᱟ ᱾ ᱩᱱ ᱠᱷᱚᱱ ᱜᱮ ᱵᱚᱸᱜᱟ ᱵᱩᱨᱩ ᱠᱚ ᱢᱟᱱᱟᱣ ᱵᱟᱛᱟᱣ ᱟ.ᱜᱩ ᱣᱟᱠᱟᱫ ᱠᱚᱣᱟ ᱾ 

ᱪᱟᱢᱯᱟ ᱫᱤᱥᱚᱢ ᱯᱚᱨᱮ ᱠᱷᱚᱱ ᱛᱚᱲᱮ ᱯᱩᱠᱷᱨᱤ ᱵᱟᱦᱟ ᱵᱟᱸᱫᱮᱞᱟ ᱧᱩᱛᱩᱢᱟᱱ ᱫᱤᱥᱚᱢ ᱦᱟᱯᱲᱟᱢ ᱠᱚᱫᱚᱠᱚ ᱪᱟᱞᱟᱣ ᱮᱱᱟ ᱾ ᱟᱨᱦᱚᱸ ᱚᱱᱰᱮ ᱠᱷᱚᱱ ᱫᱚ ᱡᱚᱱᱟ ᱡᱚᱥ ᱯᱩᱨ ᱚᱱᱰᱮ ᱠᱷᱚᱱ ᱫᱚ ᱠᱷᱟᱥ ᱯᱟᱞ ᱛᱮ ᱟᱨ ᱚᱱᱰᱮ ᱠᱷᱚᱱ ᱥᱤᱨ ᱫᱤᱥᱚᱢ ᱥᱤᱠᱟ.ᱨ ᱫᱤᱥᱚᱢ ᱛᱮᱠᱚ ᱪᱟᱞᱟᱣᱮᱱᱟ ᱾ ᱜᱟᱝ ᱱᱟ.ᱭ ᱥᱩᱲᱟ. ᱱᱟ.ᱭ ᱛᱮᱠᱚ ᱯᱟᱨᱚᱢ ᱪᱟᱞᱟᱣᱮᱱᱟ ᱟ.ᱰᱤ ᱡᱷᱟᱞ ᱡᱷᱟ.ᱞ ᱠᱚ ᱯᱟᱨᱚᱢ ᱪᱟᱞᱟᱣ ᱤᱫᱤᱭᱮᱱᱟ ᱾ ᱡᱚᱥ ᱯᱩᱨ ᱫᱚ ᱢᱚᱫᱷᱭᱟ ᱯᱟᱨᱫᱮᱥ ᱨᱮ ᱢᱮᱱᱟᱜᱼᱟ ᱟᱨ ᱥᱤᱠᱟ.ᱨ ᱫᱤᱥᱚᱢ ᱫᱚ ᱱᱤᱫ ᱦᱚᱸ ᱪᱷᱚᱴᱟ ᱱᱟᱜᱯᱩᱨ ᱨᱮᱭᱟᱜ ᱜᱤᱨᱤᱰᱤᱦ ᱡᱤᱞᱟ. ᱨᱮᱭᱟᱜ ᱯᱟᱨᱟᱥ ᱱᱟᱛᱷ ᱵᱩᱨᱩ ᱴᱚᱴᱷᱟ ᱨᱮ ᱧᱩᱢ ᱧᱟᱢᱚᱜᱼᱟ ᱾ ᱡᱮᱱ ᱫᱷᱚᱨᱚᱢ ᱦᱚᱲ ᱠᱚᱣᱟᱜ ᱥᱚᱶᱦᱮᱫ ᱨᱮ ᱱᱚᱣᱟ ᱫᱚ ᱥᱟᱢᱢᱮᱫ ᱥᱮᱠᱷᱚᱨ ᱧᱩᱛᱩᱢ ᱛᱮ ᱵᱟᱰᱟᱭᱚᱜ ᱠᱟᱱᱟ ᱾ ᱯᱟᱨᱟᱥᱱᱟᱛᱷᱟ ᱫᱚ ᱩᱥᱩᱞ ᱵᱩᱨᱩ ᱪᱩᱲᱟ. ᱠᱟᱱᱟ ᱾ 
ᱦᱟᱲ ᱦᱚᱯᱚᱱ ᱫᱚ ᱪᱟᱢᱯᱟ ᱫᱤᱥᱚᱢ ᱨᱮ ᱠᱷᱮᱨᱣᱟᱲ ᱢᱮᱱ ᱛᱮᱠᱚ ᱵᱤᱠᱟ.ᱣ ᱞᱮᱱᱟ ᱤᱱᱟ ᱯᱚᱨᱮ, ᱵᱮᱝᱜᱚᱞ ᱫᱤᱥᱚᱢ ᱢᱤᱫᱱᱤ ᱯᱩᱨ ᱥᱟᱱᱛ ᱫᱤᱥᱚᱢ ᱨᱮ ᱥᱟᱶᱛᱟᱞ ᱧᱩᱛᱩᱢ ᱛᱮ ᱠᱚ ᱵᱤᱠᱟ.ᱣᱮᱱᱟ ᱾ ᱚᱱᱰᱮ ᱟ.ᱰᱤ ᱫᱤᱱ ᱠᱚ ᱛᱟᱦᱮᱸᱭᱮᱱᱟ ᱚᱱᱟ ᱛᱮ ᱥᱟᱛ ᱦᱚᱲ ᱪᱮ ᱥᱟᱱᱛᱟᱲ ᱧᱩᱛᱩᱢ ᱛᱮᱠᱚ ᱵᱟᱲᱟᱭᱮᱱᱟ ᱾ ᱥᱟᱱᱛᱟᱲ ᱯᱟᱨᱜᱟᱱᱟ ᱨᱮᱫᱚ ᱥᱟᱸᱛ ᱫᱤᱥᱚᱢ ᱠᱷᱚᱱ ᱰᱷᱮᱨ ᱦᱚᱲ ᱠᱚ ᱦᱮᱡ ᱟᱠᱟᱱᱟ ᱾ ᱥᱟᱱᱛᱟᱲ ᱦᱚᱯᱚᱱ ᱫᱚ ᱟᱵᱚ ᱫᱤᱥᱚᱢ ᱡᱟᱭᱜᱟ ᱨᱮᱫᱚ ᱡᱟ.ᱡᱷᱤ ᱧᱩᱛᱩᱢ ᱛᱮᱦᱚᱸ ᱠᱚ ᱵᱟᱰᱟᱭ ᱧᱟᱢᱮᱱᱟ ᱾